so üse jährlech „geburi“-städtetrip steit uf äm programm. chli bescheide gö mir das johr „nume“ uf dornbring/bregenz. aber ou die städtli hei ganz viu charme und ichoufsströssli.
nachdäm mir s’hotel sonne in dornbirn gfunge hei, sie mir de aber gad witer uf bregenz. uf äm weg zum bodensee sie mir de dür das härzige städtli gschländeret und hei üs schomou überleit i welli Lädeli mir de no wei. bim nä feine z’Mittag bi herrlechem sunneschin und blick uf ä see hei mir de üses weekend so richtig startet. nach üsere Sterchig si mir de zrugg is städli und hei afang mou äs paar läde unsicher gmacht bevor mir üs de uf d’Jagd nach äm nä geocache gmacht hei. die jagd het üs de chli i d’oberstadt gfühert und bir chile si mir de fündig worde.
früsch duschet hei mir de am obe z’dornbrin nach äm nä guete restaurant uschout ghaute und üs de für näs italiänischs entschiede. d’meinige übers ässe si vo sehr guet, fein, kommisch bis interessant gsi. bim änä drinkli uf äm dorfplatz hei mir üs de meh oder weniger geiniget, das mir am sundi ufä Pfänder mit äm Bändli ufe gö und de abeloufe.
nach äm richhaltige z’morge hei mir üs de üf ä weg zum pfänder gmacht. gmütlech si mir mit äm bändli uf ä dä berg, wo gad so äs paar Verruckti am ufeseckle si gsi (pfänderlauf). die schöni ussicht hei mir i vou züg gnosse, äs isch würklech sehr schön gsi. äs chlises spaziergängli dür ä tierpark pfänder het üs de zur falknerei gführt und mir hei üs de ä show agluegt. vor üsere nase si falke, geier, eule und viumeh gfloge.
so und ab geits richtig Tal, dr abstieg isch auso nid nume äs spaziergängli gsi sonder meh wie s'lied „über stock und über Stein aber brich dir nicht das bein“. s’bei het sich zum glück nimer broche. uf üsem steile abstieg hei mir de ou no äs paar geocaches gfunge und si de mit gwaglige kneu z’bregenz acho. nachdäm mir de nach üsere bergtour no äs chlises abstächerli i d’oberstadt gmacht hei si mir de unger die verdienti Duschi.
scho wieder isch obe und mir mache üs uf d’suechi nach ämnä guete stück fleisch, tip top mir hei äs steakhouse gfungeund äs heit freii tische wunderbar luege mir doch gad i Karte. Eeeeeem würum hets i dere charte nume tapas und so zügs?? ups, falschli beiz. ok nach äm nä aperöli hei mir de dr richtig igang gfunge und hei äs sehr feins z’nacht gnosse. dr obe hei de fasch aui vo üs uf dr dachterrasse vo üsem hotel lo usklinge.
leider isch üses städetrippli scho fasch wieder düre. nachdämmir shoppingqualitäte vo dornbirn teschte hei, wo auso ou nid so cheibe schlächt si, mache mir üs de uf ä heiweg und freue üs scho uf üse nöchscht „geburi“-Städetripp. wo geits äch häre? d‘diskussione si interessant gsi, i norde? fänemark? stockholm? oslo? oder uf die britische insle? mir wärdes gseh nach em nöchste doodle.
